ARCHIVIe STORICh E FOTOGRAFICh

COLOCAZION

l materièl de l'Archivie Storich é logà te vedrines e armeres e se pel l consultèr demò su autorisazion del personal de la biblioteca o de la Direzion de l'Istitut.

ARCHIVIe STORICh

Te na sala aposta, sul medemo piano de la biblioteca, l’é l'Archivie storich. Se trata en gran pèrt del Fondo “Père Frumenzio Ghetta”, donà dal storich enstes a l'Istitut acioche duc i documents su la Val de Fascia biné adum da el vegne stravardé, conservé e valorisé te la ”majon di fascegn”.

Jà dai egn '80 la Biblioteca conserva l “Fondo Iori” che tol ite na gran varietà de documents che va da chi più veiores che revèrda la storia politica e sozièla de la Val enscin al passaje a la Tèlia, a chi su la sociazions e i moviments ladins dal 1946 en cà, enscin a chi che revèrda la vita e l'atività del medemo Guido Iori Rocia, apeda a articoi de stampa e auter amò.

N'autra regoeta emportanta l'é chela de l'Archivie “Canori-Piccoliori”. L’é documents de desferenta sort de l'artist moenat Ermanno Zanoner, en èrt Luigi Canori, e de sia atività de scritor e musizist (partidures, scric, letres, retrac, fotografìes, libres).

N auter archivie da recordèr l’é l'Archivie de la partidures de la Sozietà filarmonica de Vich jà ordenà aldò de na pruma catalogazion.

Apede chisc fondi troon ence etres archivies documentèi per ladin, na pèrt en originèl e na pèrt en copia fotostatica, de la seconda metà del XX secol: se trata en particolèr de l'Archivie “Mazzel”, regoeta di tesć radiofonics de la trasmiscion “Dai Crepes del Sela” a cura de don Massimiliano Mazzel, e de l'Archivie “Simon de Giulio” con na gran regoeta de tesć ladins de Simon Soraperra de Giulio. Apede chisc doi archivies se troa chiò ence regoetes mendres de etres autores fascegn.

COLOCAZION

I originai de la fotografìes e de la diapositives i é te n armer aposta e se pel i consultèr dò aer abù l’autorisazion del personal de la biblioteca e/o di archivies.

ARCHIVIe FOTOGRAFICh

Te na sala apede jù la biblioteca l’é ence l'Archivie fotografich con veia fotografies (originèi e reproduzions) e documentazion d’anchecondì (retrac a colores, bianch e neigher e dia). Gran pèrt di documents de l’archivie fotografich, en dut zirca 3500, é stata cataloghèda e schedèda e é desponibola su suport digitèl e se pel la consultèr ence tras l portal www.scrin.net.

Regolament per i servijes de archivie

Domana de autorisazion per dorèr l materièl fotografich e audio-video