servijes EDUCATIVes
Ativitèdes didatiches e de valorisazion del patrimonie culturèl ladin
L Museo Ladin de Fascia
L’é stat pissà da l’Istitut Cultural Ladin “majon di fascegn”, ent funzionèl de la Provinzia Autonoma de Trent che l laora dal 1975 a sostegn de la comunanza ladina, mendranza linguistica tel cher de la Dolomites.
L percors espositif, inaudà del 2001, rejona de la jent ladina e de sie prozess de formazion tras ogec e testimonianzes che ne conta la vita, la tradizions e l lengaz dai tempes veiores enscin aldidanché.
L projet museèl, amò apede, tol ite l Museo sul teritorie con sia “Sezions locales” che les porta dant n percors sun duta la val e les dèsc l met de cognoscer più a fon argoments spezifics e de ge dèr valor didatich a colezions etnografiches de gran enteress.
I Servijes Educatives
L sparpagnament e l’aprofondiment de la cognoscenzes che revèrda na comunanza de mendranza che se tol fora per sia particolaritèdes culturèles e linguistiches, l’é l fondament de duta l’atività di Servijes Educatives del Museo Ladin. Percorsc de descorida, laboratories didatics e raides culturèles dèsc l met de descorir i desvalives aspec de la ladinità: da l’archeologìa al fabricat storich, da l’oget artistich a l’èrt de cultura materièla, da la tradizions a la ritualità populèra.
La ativitèdes didatiches les vegn portèdes dant per ladin o per talian e les sporc n didament utol a la scoles del post per la cognoscenza e la valorisazion de l’identità del teritorie e na proponeta culturèla percacenta per l turism scolastich.
La perferida didatica per la scola e per i gropes
- Percorsc de descorida, laboratories didatics e raides sul teritorie desferenzié per livel de età e per degré de cognoscenza e studie de la cultura ladina
- Projec en partenariat, tras na fona colaborazion anter l Museo e la scola, pissé aldò di percorsc de curriculum de la clas
- Didatica sul teritorie con percorsc e laboratories tematics te la desvaliva sezions del Museo loghèdes te duta Fascia
- Vìjites vidèdes e percorsc per l’utenza turistica pissé per arvejinèr scolees e etres gropes a la jent ladina, per n “turism culturèl” sćiantif, che l’engaisse la scontrèda e l’educazion a na sozietà multietnica e multiculturèla
