Ativité didatica y de valorisazion dl patrimone cultural ladin

I Servijes Educatives del Museo Ladin de Fascia se ouc tant a la scoles (del post e de foravìa), che ai turisć, con percorsc de descorida e projec didatics che dèsc l met de se arvejinèr a la cultura ladina da più ponts de veduda: da l’archeologìa al fabricat storich, da l’oget artistich a l’èrt de cultura materièla, dai guants a la ritualità populèra.
Vigni percors se sporc desche esplorazion del teritorie, obietif che caraterisea dut l Museo, e l se svilupea anter la sales espositives e la Sala multimedia, che pel esser durèda per ativitèdes desvalives e olache l’é a la leta la tecnologìes informatiches più modernes, per ruèr aldò del besegn a la Sezions locales o te etres lesc de la val.
La difujion e l studie de la cognoscenzes che revèrda na comunanza de mendranza, da la caraterisazion forta data da sie lengaz e da sia cultura, i se met dant doi obietives: da na man chel de ge dèr ai ladins amò più coscienza de sia identità e de la emportanza de sia valorisazion, da l’autra ge dèr l met ai vijitadores de spartir e aprijièr chesta richezes.

I Servijes Educatives met a la leta:
• n ofize didatich avert al publich e en particolèr ai ensegnanc, per se baratèr informazions, propostes e consees.
• la Sala multimedia “Luigi Heilmann”, averta per enrescides e lurieres de grop, con computer a la leta di utenc e pont de azess prinzipal al Sistem SCRIN, fenestra tecnologica che permet de consultèr sorì filmac, fotografìes, tesć e documents.

e i met dant:
• la realisazion de projec educatives porté inant en colaborazion anter l museo e la scoles, pissé aldò di percorsc de curriculum de la clas
• corsc de agiornament e formazion per ensegnanc e autra agenzìes educatives, e ocajions de enrescida spezialistica te ciampes culturèi spezifics
• percorsc educatives, per ladin o per talian, desferenzié per livel de età e per degré de cognoscenza e studie de la cultura ladina
• percorsc e vìjites vidèdes per l’utenza turistica, per ladin, talian e lengac foresć, pissé per arvejinèr scolees e etres gropes a l’etnìa ladina, per n “turism culturèl” sćiantif