Servijes linguistics
TECNOLOGÌES PER l LENGAZ LADIN
I projec per l'informatisazion del lengaz, struments e ressorses linguistiches, n patrimonie ades a la leta ence online
A partir dai egn Nonanta, l'Istitut Cultural Ladin à dedicà la maor pèrt de sia atività linguistica a projec finalisé a l'informatisazion e a la modernisazion del lengaz ladin, te n chèder de cooperazion con autra istituzions culturèles ladines.
Tel chèder de chisc projec, realisé ence de gra a la colaborazion de partner de gran valuta desche l’ITC-IRST de Trent, l’é stat lurà fora strumenc modergn per l svilup e la gestion de ressorses lessicales e testuèles e per l tratament automatich del lengaz
I strumenc e la ressorses linguistiches che l’é stat binà ensema e lurà fora col didament de chesta neva tecnologìa i é ades a la leta on-line (www.ladintal.it).
L LENGAZ, N PATRIMONIE DA DEFENER...
L'Istitut Cultural Ladin à na pèrt zentrèla te la defendura, tel sostegn e te la promozion del lengaz ladin, l prum simbol identitèr de la comunanza fascèna.
Un di prumes obietives de l'atività culturèla l’é chel de stravardèr l lengaz acioche no l se perde fora, tant te la doura che tel lessich patrimonièl. La politica de conservazion vegn metuda en doura col recuperèr e valorisèr l lessich tradizionèl tras la regoeta e l studie de la ressorses desponiboles. La fontènes toutes en conscidrazion tol ite regoetes lessicografiches, metudes ensema da dizionères e vocabolères scric per la maor pèrt te la seconda metà del XX secol, fontènes scrites, dantdaldut tesć de autores del post che te sia atività à descrit e testimonià sul papier l patrimonie tradizionèl de cultura, folclor, usanzes e mestieres de Fascia, e tinultima fontènes a ousc.
...E NA OPORTUNITÀ DA FÈR CRESCER
N auter obietif primèr de l'atività de l'Istitut l’é chel de fèr a na vida che l ladin sie n lengaz modern, da poder durèr te duc i setores de la comunicazion, da l'aministrazion e la scola a la produzion leterèra e artistica.
Chest lurier, che anter l’auter pel esser vedù te la rica produzion editorièla de l'Istitut, se met desche obietif chel de fèr doventèr l ladin n lengaz semper più vif: no n lengaz da museo, e nience, de l’auter vers, n lengaz da ofize, ma n lengaz con chel che se posse e se vobie comunichèr. Percheche chest program garate, no se pel fèr condemanco de l'interazion con la autra realtèdes culturèles e economiches che l’é te val: la scola, i enc publics, la stampa, la istituzions culturèles, i operatores turistics e comerzièi.
