MIA majon, MIA storia, MIA parlèda
Chest an l’Istitut Cultural Ladin “majon di fascegn” festejea i 40 de la biblioteca dedichèda a Père Frumenzio Ghetta e i 20 egn del Museo Ladin.
#miamajonmiastoriamiaparleda: festejon ensema la cultura ladina
La cultura ladina t’es ence tu. L’é chest l pensier d’amor che volon fèr jir fora per la strèdes e te anter la jent.
Chel tanche scomenzà, l’é n an emportant per la cultura ladina fascèna. Noscia Biblioteca dedichèda a Père Frumenzio Ghetta e nosc Museo Ladin de Fascia i festejea i 40 e i 20 egn da canche i é nasciui e, via per i meisc che vegn aon pervedù duta na rela de evenc, mostres e programes che vel lejer la istoria, viventèr l prejent e se pissèr l davegnir.
N an no demò de festejamenc, ma ence na ocajion unica per ge dèr foja a na neva idea de stravardament de la cultura ladina olache condivijion e interazion posse dassen didèr a meter en pe n vero distret ladin, fat da la jent e per la jent. Per chest la cultura la jirà fora da usc, la se n jirà stroz per strèda con n program dinamich e gustegol, zenza perauter se desmentièr che l’Istitut à sia pèrt istituzionèla da tegnir auta. Vardaron de portèr inant con respet e dedizion l prezious dover che ne é stat dat te man, ma tel medemo temp, vardaron de se molèr fora con n muie de proponetes desvalives per ogne età, a na moda che ogneun posse sentir dassen MIA chela realtà che raprejenton e che sion.
N slogan Mia Majon, Mia Storia, Mia Parlèda nasciù da la volontà e dal piajer de tor ite duc chenc. N slogan inovatif che se tiraron do te duta la ativitèdes dedichèdes ai festejamenc e che speron de poder portèr inant, desche na emprometuda, ence ti egn che vegn. Paroles che disc la partegnuda e che cogn entener ence i ghesć che vegn te Fascia, ma soraldut paroles che doventa fac te duta la ativitèdes che, col jir del temp, metaron a jir, ajache volon fèr jerveèr te ogne persona e te ogne paisc la semenza viva de n moviment culturèl che duc posse sentir e veder.
40 e 20 EGN. L PROGRAM DEL CEDEAN
Un di ponc de relief del program de evenc l’é segur «Mie Museo» mostra de la istoria de l’Istituzion, da sie nascer enscin anchecondì, con duc i materièi e i èrc che à permetù de binèr ensema la colezions dedichèdes a la vita de la jent ladina.
Autra neva da no perder sarà «Nos sion noscia Istoria» n toch de teater dedicà a Père Frumenzio e vèlch auter apuntament da viver live te la sezions del Museo Ladin sul teritorie: da l’Istitut Cultural Ladin al Museo Ladin de Fascia, da la Sia da Penia al Stont, dal Molin al Malghier.
E amò...
l’inaugurazion de na instalazion «Musc e oujes ladines» n projet video che portarà la jent de Fascia ite te Museo e autra scomenzadives “social” desche «L Segnaliber che volesse», per meter apede e a confront generazions desvalives chiamèdes a meter ensema dessegnes e parola sèvies de la veia tradizion ladina.
Aon pa ence en program n event dedicà a chi più joegn e feruscoi «D-gei te museo» olache, te n crescer de sons house, la fegures de la tradizion ciaparà vita te n vero e proprio dj set; n moment raprejentatif de coche, a saer se meter a una anter enc istituzionèi, sociazions del teritorie e sentadins de ogne età, se pel ge dèr la spenta a na roda de colaborazion che ciapa moviment e gaissa a stèr ensema e a se sentir pèrt de na comunanza viva.
… e la marevees no les é pa dutes chiò #staytuned #miamajonmiastoriamiaparleda
Vèrda l VIDEO: https://youtu.be/_gm_N6zqJxo
