La forza di Musees

Dì internazionèla di Musees – 18 de mé 2022

En mercol ai 18 de mé del 2022 l é la dì internazionèla di Musees metuda a jir da ICOM, con argoment “La forza di Musees”, che la porta dant l’encèria e la forza di musees de mudèr l mond dintorn.

Lesc de descorida e marevea per duc, i musees ne fèsc cognoscer nosc passà e i aur noscia vijion a neva idees: doi vèresc fondamentèi per n davegnir mior.

L argoment no podea esser più dret per la Majon di Fascegn, che ti ultimes tempes se à metù dant l obietif de se orir semper de più al teritorie e tor ite la jent de vigni età, dai joegn ai giaves.

Te chesta ocajion l Museo Ladin vel portèr dant sie contribut col meter ensema n moment de condivijion inclusif averjan l museo debant en mercol ai 18 de mé, da les 3 domesdì a les 7 da sera, mascimanenter per duc i fascegn. Perché pa no desfrutèr l fora sajon per se tor fora n moment per descorir, o veder con eies neves, nosc teritorie e noscia cultura?

Amò apede, per endrez da la Conseiera de procura del Comun General de Fascia Mirella Florian su envit de Paolo Dallapozza, te la medema dì ruarà te Museo n grop de enfughé da l’Ucraina che à troà alberch te Fascia e che i podarà coscita cognoscer vèlch da nef en cont de la cultura e de la tradizion ladines.

L Museo vel doentèr n lech per se scontrèr e per se baratèr, tor su e uzèr fora neva proponetès per l davegnir, sessaben zenza desmentièr l passà e l temp de anchecondì.

Ve speton emben te Museo Ladin en mercol ai 18 de mé da les 3 a les 7 da sera per ve moscèr la gran forza di musees, che auter no l é che sie publich medemo!

Comunicat stampa

Evenc

Shop

Newsletter

Per restèr en contat con l'Istitut e l Museo e ciapèr nesc agiornaments te envion a te enscinuèr a nosc nef servije de newsletter.

Cookies | Web Policy | Impressum | Sitemap | P.IVA 00379240229