MIE MUSEO 

arpejon per l davegnir / per ereditare il futuro

 

Mostra

14.09.2021 – 11.10.2021 

01.12.2021  – 15.04.2021

L 2021 l é l’an che zelebrea i 20 egn de la neva senta del Museo Ladin e i 40 egn de la Biblioteca dedichèda anchecondì a Père Frumenzio ghetta. L é na ocajion unica per proèr a pissèr n’idea de cultura ladina fata de maora condivijion e interazion col teritorie, con n program rich de ativitèdes pissèdes per duc, regoetes adum te la emprometuda dita fora con mia majon, mia storia, mia parlèda”.

La mostra «Mie Museo. Arpejon per l davegnir / Per ereditare il futuro» l é la pruma espojizion che conta del lurier de enrescida e regoeta portà dant ti egn per l stravardamet de la cultura ladina; n lurier de comunanza che se palesa tras dates e persones che à volù ge lascèr a la neva generazions n melaur prezious. Na mostra che ge va do al temp, olache passà, prejent e davegnir doenta esprescion sinziera de chel che l é stat, che l é e che sarà l Museo Ladin de Fascia. Èrc, fotografies, oujes e tradizions deida a meter ensema na identità che paa la speisa recordèr e soraldut portèr inant. L é nosc doer tegnir su chest patrimonie, acioche l ge rue a la generazions del davegnir, e l vardèr via vel dir ence l descorir endodanef coi eies de anchecondì. Tras la testimonianzes del temp aon l met de aer informazions e valores che ne deida a viver tel temp de anchecondì e che ne dèsc l met de enstradèr l davegnir.

L zil del Museo Ladin l é e l vel esser chel de meter te man de duc, jent da chiò e foresć, la chieves per lejer e entener la storia e la reijes del popul ladin e per envièr via n barat anter generazions desvalives, zenza ampò se serèr al davegnir, alincontra per esser pont de reflescion e de gaissa per neva modalitèdes de entener l’identità culturèla.

La mostra l é n pent col passà che vel fèr entener coche n gran numer de persones à sapù meter adum n patrimonie culturèl sćiantịf tras idees e dezijions toutes con gran anteveder. Enlongia l percors la storia de Museo la vegn contèda tras i musc de la persones che à dat sie contribut e vegnarà metù al luster valgugn anter i toc de maor enteres che à portà la jent a doentèr protagonista de Museo tras donazions e materièl dat adimprest, fin dal scomenz de la enrescides etnografiches. Portèda dant te n percors temporèl e tematich, la mostra fenesc con n video olache n grop de fascegn disc fora l esser e l se sentir ladins e co l envit a lascèr sia imprescions sul Museo de anché ma soraldut sul Museo de doman.

Na conclujion averta donca, aldò de la emprometuda del cedean “mia majon, mia storia, mia parlèda” acioche l Istitut Cultual Ladin, ence tras l Museo, l seghite a portèr dant con respet e dedizion l prezious lurier de stravardament ma, tel medemo temp, l se aure amò de più a la jent, percheche vigniun de nos posse sentir sia, e donca apontin MIA, la realtà che l raprejentea.

Evenc

Shop

Newsletter

Per restèr en contat con l'Istitut e l Museo e ciapèr nesc agiornaments te envion a te enscinuèr a nosc nef servije de newsletter.

Cookies | Web Policy | Impressum | Sitemap | P.IVA 00379240229