DO L VIÈL DEL SAER

Père Frumenzio vel te dir vèlch

Vijita teatralisèda per ladin

L 2021 l’é l’an de la zelebrazions per i 40 egn de la biblioteca de l’Istitut Cultural Ladin che dal 2014 la é entitolèda al studious storich fascian Père Frumenzio Ghetta.

No se trata demò de scomenzadives per recordèr n cedean, ma ence na ocajion unica per se pissèr e ge dèr foja a na neva idea de cultura ladina, fata de condivijion e interazion con n program rich de ativitèdes dedichèdes a duc e binèdes adum sot al ciapel de na emprometuda che sona coscita: mia majon, mia storia, mia parlèda.

DO L VIÈL DEL SAER - Père Frumenzio vel te dir vèlch l’é enveze l titol de n toch de teater per ladin che vegnarà spilenà ai 26 de setember te Istitut Cultural Ladin. Na data che croda giusta apontin canche vegn festejà la Dì Europeèna di Lengac, metuda su per recordèr l’emportanza de duc i lengac e ge dèr l giust valor al plurilinguism e a la comprenjion interculturèla con atenzion particolèra a la defendura de duta la mendranzes linguistiches, te anter ence chela ladina.

L teater DO L VIÈL DEL SAER - Père Frumenzio vel te dir vèlch l vegnarà raprejentà più che n’outa via per l dì, da les cinch e da les set da sera acioche duc posse l veder, zenza che se bine massa jent adum, e l’é dedicà a un di prumes fondatores de l’Istitut Cultural Ladin, père Frumenzio Ghetta. N teater itinerant e rich de emprometudes, pissà per maraveèr e soraldut per recordèr l’om, frate e studious unich te l’epigrafe antica de la storia ladina.

Che ne conta l’é Alberta Rossi, responsabola de la Biblioteca che porta l’inom de père Frumenzio: «Se aon fegurà de scontrèr Père Frumenzio Ghetta amò vif, na maniera per ge ruèr apede a l cognoscer aldelà de chel che l’à fat e scrit, na maniera per l recordèr desche persona, ajache père Frumenzio, umol e resservà descheche l’era, l’à passà dut l temp che l podea aer, no demò do si doveres  de om de Die e de ciarità, ma ence do l recupero de manoscric che, de grazia a sie lurier chiet e pazient, i é rué fin a nos anchecondì e en grazia de chi che l’à podù meter ensema i toc de la storia de Fascia. No ve contaron dut ma… sarà père Frumenzio enstes a ge rejonèr a la jent acioche no vegne destrabonì l’amor per i valores da zacan. No sarà demò n freit e destacà recordèr Père Frumenzio via per chest an, ma n fon e sentù rengraziament a l’om che, per noscia cultura ladina, l’é più vif che zenza.

L’idea la é de David Dorich da Poza e l test e la regia de Ilaria Chiocchetti da Moena».

La raprejentazion de domenia ai 26 de setember l à fat l sold out.

Donca, coche tenc à domanà, l spetacol l vegnarà fat endo domenia ai 3 de otober da les 16.00 e a les 18.00.

Per se prenotèr telefonèr te secretariat de l Istitut al 0462 764267 (ence Whatsapp) ti oraries de ofize enscina ai 2 de otober.

Evenc

Shop

Newsletter

Per restèr en contat con l'Istitut e l Museo e ciapèr nesc agiornaments te envion a te enscinuèr a nosc nef servije de newsletter.

Cookies | Web Policy | Impressum | Sitemap | P.IVA 00379240229