“SE ÈRT E ECONOMIA SE SCONTRASSA”
“Se èrt e economia se scontrassa” l é l titol de la scomenzadiva che l Museo ladin a chela de fèr peèr via per valorisèr i artisć fascegn tras l’economia. La prejentazion del projet la sarà ai 16 de otober, aló da la ostaria-biraria Rampeèr, a Ciampedel, endèna la inaudazion a la reversa de la mostra “N scrign o na fior”.
Tras na colaborazion curiousa anter èrt del post e strutures economiches l Museo vel ge dèr l via al projet più gran de tor ite l teritorie te la valorisazion de l’èrt a na vida sinergica e originèla, col averjer n debatit identitèr e culturèl con sia jent.
Vegnarà engaissà l confront anter artisć e operatores economics, per projetèr ensema col Museo ladin la mostres del davegnir.
I locai publics - ostaries, restoranc, boteighes, impianc portamont, e c. i. – i pel se portèr dant per doventèr na senta destachèda del Museo, col sporjer sia lèrga per meter fora la operes de n artist fascian. L obietif l é de ge dèr valor a l’identità del post, acioche nos fascegn, dantdaldut, recognosciassane e fossane stolc de noscia ladinità e di talenc de noscia tera.
Se te es n artist o n operator economich che à i requisic enjonté a chest avis, no spetèr a tor contat col Museo ladin e doventa protagonist de tia val.
Per tor pèrt a la scomenzadiva i operatores economics vegn envié e esser al event dai 16 de otober aló da la ostaria biraria Rampeèr, a Ciampedel; ve preon de ve prenotèr chiaman ite o manan ite n messaje whatsup al Istitut cultural ladin sul numer de telefon 0462/764267.
Per de autra informazions chiamèr ite l Istitut sul medemo numer 0462/764267.
ARTIST - Desćèria l model de inscinuazion
OPERATOR ECONOMICH - Desćèria l model de inscinuazion
N SCRIGN O NA FIOR
MOSTRA A LA REVERSA DE L’ARTISTA VERONICA ZANONER PICCOLIORI
Se èrt e economia se scontrassa
La mostra d’èrt “N SCRIGN O NA FIORN” de Veronica Zanoner Piccoliori la vel inaudèr na usanza che l’Istitut e l Museo ladin met a jir per ge dèr luster ai artisć ladins del passà e da anchecondì tras na artista de età, sun sie document ma no pa te sie esser e fèr: Veronica Zanoner Piccoliori, de 98 egn, da Moena de naa ma che la vif jun Busan. Na FEMENA fia de noscia tera, che l’é l leam anter passà e davegnir.
La mostra vegnarà metuda a jir dai 21 de aost ai 16 de otober aló da la neva biraria artejanèla Rampeèr, a Ciampedel, averta del 2020; vèlguna operes farà da coleament a la espojizion te la sentes del Museo e de l’Istitut. Na mostra che ge vegn dit a la reversa, percheche, apontin a la reversa, l’inaudazion la sarà ai 16 de otober, dì che la vegnarà serèda.
Endèna l’inaudazion sarà portà dant ence la scomenzadiva co l’inom “Se èrt e economia se scontrassa”. Sarà n moment per se baratèr idees e pensieres con nesc artisć e coi operadores economics, per programèr dessema la scomenzadives per l davegnir.
