Popoli senza Frontiere 2

Tradizioni e territori delle minoranze linguistiche storiche del Trentino. Cimbri, Ladini e Mòcheni

Na publicazion nazionèla per uzèr fora l valor de la mendranzes linguistiches de la Provinzia de Trent. Ai 28 de jugn te Fascia

Passa 200 fotografies per n liber dedicà a la comunitèdes e endrezà dal Ministèr de la Cultura:  prejentazion ai protagonisć e al publich per averjer l istà 2022.

En mèrtesc ai 28 de jugn, da mesa les 6 da sera, te senta del Museo Ladin de Fascia a Sèn Jan, vegnarà portà dant la neva publicazion de la Provinzia de Trent e del Minister de la Cultura “Popoli senza Frontiere 2. Tradizioni e territori delle minoranze linguistiche storiche del Trentino. Cimbri, Ladini e Mòcheni”. L liber l é stat metù adum co la colaborazion del BIA – Beni immateriali e Archivistici e la partezipazion de l’Università de Trent, del Istitut Cultural Ladin “majon di fascegn”, del Kulturinsititut Lusern per i zimbres e del Bersntoler Kultuinstitut per i mochegn; l é stat curà da la demoetnoantropologa Valentina Santonico e dal fotgraf Roberto Galasso.

Se trata de n projet tout ite te la regoeta del Istitut zentrèl per l patrimonie imaterièl, per chel che i doi studiousc laora, col zil de valorisèr i patrimonies culturèi de la mendranzes linguistiches taliènes. Na pruma publicazion la ge é jà stata dedichèda a la comunitèdes arbëreshë de la Calabria, furlèna, croata del Molise, grika del Salent, ozitèna e slovena. L’idea, che la nasc da n projet più slarià fora con de autra ativitèdes de valorisazion de chisc popui - “Gli Italiani dell’Altrove” -, l se met dant de endrezèr n test che l abie tant na valuta scientifica che contegnui più divulgatives, che i engaisse chi che studia e enrescesc la mendranzes, ma ence i viajadores curiousc che se embat te chest argoment.

L liber l é metù adum da curc scric e da presciapech 200 fotografies che porta dant la trei comunitèdes linguistiches dal pont de veduda de l’economia e del teritorie, de l’architetura rurèla e de neva interpretazions de la magnadiva tradizionèla. Ben segur con protagonisć del post, per Fascia: l cogo da steila Michelin Stefano Ghetta che con sia mère, Dora Tamion e sia fia Giorgia ge dèsc luster a l’èrt de cojinèr emparèda te cèsa e valorisèda con sia braura e fantasia; e Sara Desilvestro, la joena produtora e fondadora del marchie N’outa, con sia pascion per la coltivazion de la tera e la doura de sie prodoc desche zacan. E amò apede la monts, i paesajes e l’architetura de Fascia, simbol e esprescion de na cultura veiora che no se lascia fèr ju e ge dèsc luster e orgolie a na val rica de turism, ma amò cuna de valores che se cogn esser stolc de portèr inant.

L é n moment gustegol e rich, donca, chel de en mèrtesc ai 28 de jugn, da no verjumèr. Chiamon ite operatores turstics, sociazions, jent de cultura, ensegnanc, duc i sentadins de Fascia e i ghesć che taca jà a busièr te val, che à gust de se recognoscer te chesta mendranza, de se confrontèr con cheles apede e de descori cotant aprijià e amà che l é nosc teritorie.

Chi che tolarà pèrt a la scontrèda ciaparà l liber en don.

scheda del liber

Events

Shop

Newsletter

To stay in contact with the Institute and the Museum and to receive our updates, register for our new newsletter service.

Cookies | Web Policy | Impressum | Sitemap | P.IVA 00379240229