IDENTITÈDES ADUM
Na neva endesfida per la Majon di Fascegn
L Museo Ladin ge dèsc luster a la desvalivanza e l chier foresć e ladins che à gaissa de stèr e fèr adum, per se baratèr cultures, lengac e identità.
Nef travert e neva endesfida per la Majon di Fascegn che, tres l Museo Ladin, l’à chela de endrezèr n event de barat identitèr, culturèl e linguistich, chiaman ite la desvaliva cultures che vif te chest raion.
Te Fascia stèsc ensema jent che vegn da autra valèdes del Trentin-Sudtirol, da autra regions de la Tèlia, da etres stac europeèns e ence da etres continenc. Chesta picola val, ela medema cuna de na identità veiora, la più veia de la Èlpes, chela ladina, la à semper desmostrà gran avertura e capazità de se confrontèr, se adatèr, crescer e respetèr la desvalivanza, la tolan su desche don e richeza.
Pisson che no sie n post più adatà che l Museo Ladin - testamonech de la civiltà ladina te la storia ma ence te sia atualità e vitalità e majon di sentadins de chesta val - per tor dant i desvalives popui che vif chiò, col se baratèr con ic usanzes, tradizions, valores, cherdenzes, simboi, guants, lengac che i caraterisea.
Volassane meter adum n grop de jent ladina e da foradecà per endrezèr n event deldut nef e foradeanter, che l sarà en mercol ai 3 de mé, te Museo Ladin, endèna la setemèna de l’Aisciuda Ladina-festival del lengaz.
Envion donca duta la families e la persones vegnudes a viver te Fascia e i fascegn che à voa de se confrontèr con cultures neves e desvalives a tor pèrt a chesta scomenzadiva, chiaman ite l Museo Ladin al numer 0462/760182 o scrivan n mesaje whatsapp sul medemo numer con inom, cognom e da olache se vegn, se l è meso dant che sie fora en vender ai 7 de oril del 2023.
