• 68 

servijes EDUCATIVes

Ativitèdes didatiches e de valorisazion del patrimonie culturèl ladin

L Museo Ladin de Fascia l’é na realisazion de l’Istitut Cultural Ladin “majon di fascegn”, ent funzionèl de la Provinzia Autonoma de Trent che laora da trent’egn a sostegn de la comunanza ladina, mendranza linguistica tel cher de la Dolomites.

La neva senta del Museo, orida del 2001, porta dant de neva possibilitèdes per ruèr ite più sot a la cognoscenza de la cultura ladina, metan a la leta sales ordides dò criteries espositives de calità, e apede chestes lesc aposta e infrastrutures destinèdes a na didatica museala a l’auteza di tempes.

I Servijes Educatives del Museo Ladin de Fascia se ouc tant a la scoles (del post e de foravìa), che ai turisć, con percorsc de descorida, laboratories didatics e raides culturèles che dèsc l met de se arvejinèr a la cultura ladina da più ponts de veduda: da l’archeologìa al fabricat storich, da l’oget artistich a l’èrt de cultura materièla, dai guants a la ritualità populèra.

Vigni percors se sporc desche esplorazion del teritorie, obietif che caraterisea dut l Museo, e l se svilupea anter la sales espositives, la Sala multimedia, che pel esser durèda per ativitèdes desvalives e olache l’é a la leta la tecnologìes informatiches più modernes, per ruèr aldò del besegn a la Sezions locales.

La difujion e l studie de la cognoscenzes che revèrda na comunanza de mendranza, da la caraterisazion forta data da sie lengaz e da sia cultura, i se met dant doi obietives: da na man chel de ge dèr ai ladins amò più coscienza de sia identità e de la emportanza de sia valorisazion, da l’autra ge dèr l met ai vijitadores de spartir e aprijièr chesta richezes.

I Servijes Educatives del Museo Ladin de Fascia met a la leta:

  • n ofize didatich avert al publich e en particolèr ai ensegnanc, per se baratèr informazions, propostes e consees;
  • la Sala multimedia “Luigi Heilmann”, averta per enrescides e lurieres de grop, con computer a la leta di utenc e pont de azess prinzipal al Sistema SCRIN, fenestra tecnologica che permet de consultèr sorì filmac, fotografìes, tesć e documents.

I met dant chesta ativitèdes:

  • percorsc e vìjites vidèdes per l’utenza turistica, ence per lengac foresć, pissé per arvejinèr scolees e etres gropes a l’etnìa ladina, per n “turism culturèl” sćiantif, miré a scontrèr e educhèr a na sozietà multietnica e multiculturèla;
  • la realisazion de projec en partenariat anter l museo e la scoles, pissé aldò di percorsc de curriculum de la clas;
  • corsc de agiornament e formazion per ensegnanc e autra agenzìes educatives, e ocajions de enrescida spezialistica te ciampes culturèi spezifics.

 

Evenc

No l'é evenc en program.

Shop

Newsletter

Per restèr en contat con l'Istitut e l Museo e ciapèr nesc agiornaments te envion a te enscinuèr a nosc nef servije de newsletter.

Privacy Newsletter | Cookies | Privacy | Impressum | Sitemap | P.IVA 00379240229