Novitèdes editorièles

Scritores Ladins

Materiali per la storia della letteratura ladina di Fassa

Na opera che bina adum te n liber soul i contribuc de carater linguistich e leterèr sparpagné fora te desvaliva anèdes de “Mondo Ladino” e te de autra publicazions, metui ensema te caranta egn de atività da Fabio Chiocchetti, diretor de l’Istitut Cultural Ladin. “Materiai de lurier”, donca, vegnui fora dal besegn de binèr ensema, studièr e fèr cognoscer a la jent duta na lingia de tesć ladins, veies e manco veies, mai publiché o senestres da troèr fora; studies che ades vegn perferii, revedui e comedé fora, dantdaldut per l mondo de la scola desche ence a chi che ge pervegn de tramanèr la “cultura ladina” a la generazions che vegn dò.

I scric, pèrt per talian, pèrt per ladin, i é metui jù en orden cronologich, con chela de dessegnèr fora amàncol l’idea de n percors storich coerent: l’atenzion é focalisèda mascimamenter su la testimonianzes scrites documentèdes tel cors de l’Otcent (Pruma Pèrt), su la fasa de l’empegn “militant” del prum Nefcent (Seconda Pèrt), e su la maraveousa fiorijon de dò la Seconda Gran Vera (Terza Pèrt), per ruèr fin sun sèva di tempes da anchecondì.

N auter tassel che se jonta al rich chèder de la publicazions dedichèdes a la linguistica e a la leteradura ladina.

 

Stories de Aloch e de Contrin

Libro + CD audio

Chest liber porta dant valguna de la lejendes publichèdes da Karl Felix Wolff te sia opera Dolomitensagen. Se la stories del "Ream di Fanes", con Dolasilla, Ey de net e Spina de Mul, les vegn da la Val Badia e da Ampez, chestes les vegnìa contèdes soraldut te Fascia e les é states toutes sù de gra a informatores fascegn desche Hugo de Rossi, Franz Dantone e Giovanni Battista Cassan. A scomenzèr da la saga de Lidsanel, dutes à più o manco a che fèr con i Arimans, verieres valorousc che aldò de la tradizion veiora aea l doer de vardèr via i confins anter la Marmolèda e l pas de Sèn Pelegrin, per defener la val dai Trujegn che bendeché i crepèa ite tel ream per portèr demez femenes e bestiam.

 

 

 

 

 

 

Il Diavolo generoso

LA STORIA DI TITA PIAZ, IL DIAVOLO DELLE DOLOMITI

N auter bel liber che rejona de Tita Piaz, l Diàol de la Dolomites. A la fin de l'800 Tita l’é n pìciol che va con sia mère a pe sa mont. L ge vèrda su a la crepes de la Dolomites che se auza aut dut entorn a el. Amò no l sà che da gran su chi monts l verjarà beleche cincanta troi neves, che japede l farà sù alberghes e refuges de nonzech, che su chi crepes l portarà re e scritores e che amò apede l lasciarà jù na pedia fona a chela che ge jirà do generazions de alpinisć e omegn de mont. Te sia vita l passarà fora doi veres e gran aventures. L sarà spent da fona generosità, da amor per la vita e da ideèi de altruism e valivanza. «Il Diavolo generoso» l’é l nef liber su la vita de Tita Piaz. L'edizion la é rica de fotografìes, stories, testimonianzes e contìes de enlouta.

 

 

 

 

 

 

La Valle di Fassa tra fantasia e realtà

RACCONTI CURIOSI A CONTATTO CON LA NATURA VERSO L'AVVENTURA

N liber originèl che porta l letor a descorir i paìjes de Fascia tras n percors particolèr: i sorainomes dac tel cors di secoi a sie abitanc. E coscita anter fantasìa e realtà, aventures e curiositèdes se “palesa” l mistèr di sorainomes che caraterisea i abitanc di desferenc paìjes. L liber l’é per talian ma l son e la beleza del ladin te la varianta de vigni paìsc l se palesa tras la ousc di personajes mitologics de la tradizion ladina. N viac a la descorida de la val de Fascia che l letor pel jir inant a descorir de persona con l'aiut de la mapes dessegnèdes tel liber e de la bela ilustrazions de l'arteterapeuta Elena Corradini. N liber per gregn e picioi al medemo temp e che l’é, descheche scrif Maria Dal Lago Veneri te la prejentazion, «na guida ezelenta ence per chi chesta val l la vif e no vel esser demò n "forest", un che passa e bèsta.»

 

 

 

 

 

 

Caterina (DVD video)

I GIORNI E LE STAGIONI.LA GRANDE GUERRA E IL PRIMO AMORE

Opera originèla che à tout ispirazion dal liber Piccolo diario di Caterina. 1912-1918: dalla pace alla grande guerra (ed. 1995),  rèra testimonianza de na joeneta metuda da la Storia dedant al drama de la vera, n'ousc sćiantiva che amò anché, dò cent egn, fèsc pissèr sui destins de l'Umanità.

Ideazion e regia: Fabio Chiocchetti

Museghes: Armando Francesco

Evenc

No l'é evenc en program.

Shop

Newsletter

Per restèr en contat con l'Istitut e l Museo e ciapèr nesc agiornaments te envion a te enscinuèr a nosc nef servije de newsletter.

Privacy Newsletter | Cookies | Privacy | Impressum | Sitemap | P.IVA 00379240229